Ársskýrslur hafa ekki verið gerðar hjá Útlendingastofnun frá árinu 2005. Undirrituð ákvað að byrja á ársskýrslu vegna ársins 2008 og klára einnig ársskýrslu vegna 2009 og 2010. Þegar tími gefst til verður farið í að gera stuttar ársskýrslur vegna áranna 2005-2007. Í ársskýrslunum er að finna ýmsan fróðleik um rekstur stofnunarinnar, eðli hans og áhrifavalda, fjölda útgefinna dvalarleyfa og afgreiddra mála og þá er fróðlegt að sjá hvernig tegundir dvalarleyfa breytast með þjóðfélagsbreytingum, eins og fjarmálakreppunni 2008. Ársskýrslur verða eingöngu aðgengilegar á netinu undir „Ársskýrslur“

Kristín Völundardóttir, forstjóri

Af gefnu tilefni bendir Útlendingastofnun á að fyrirvari sem settur var í „Ákvæði II til bráðabirgða“ í lögum nr. 96/2002 um útlendinga og kveður á um að ríkisborgarar Búlgaríu og Rúmeníu þurfi að afla sér dvalar- og atvinnuleyfis til 1. janúar 2012, er ekki lengur í gildi.  Öll ákvæði EES samningsins og útlendingalaga um ríkisborgara EES -  og EFTA ríkja gilda því um komu og dvöl ríkisborgara Búlgaríu og Rúmeníu  á Íslandi frá og með 1. janúar 2012.

Ríkisborgarar Búlgaríu og Rúmeníu sem þegar hafa fengið dvalar- og atvinnuleyfi og kennitölu því samfara, þurfa ekki að endurnýja þau leyfi, en þeir ríkisborgarar Búlgaríu og Rúmeníu sem eru að koma í fyrsta sinn til Íslands, skrá dvöl sína hjá Þjóðskrá Íslands eins og aðrir ríkisborgarar EES- eða EFTA ríkjanna.

Ríkisborgarar Búlgaríu og Rúmeníu sem eiga umsóknir í vinnslu hjá Útlendingastofnun og/eða Vinnumálastofnun fá ekki útgefin leyfi og ber þeim að skrá dvöl sína hjá Þjóðskrá Íslands.

Svar vegna ummæla um flóttamenn og afdrif þeirra

Síðastliðinn fimmtudag birtist grein eftir Baldur Kristjánsson og Teit Atlason í Fréttatímanum undir yfirskriftinni Flóttamaður – Glæpamaður. Teitur Atlason birti einnig pistil á bloggi sínu á dv.is 19. nóvember s.l. þar sem fjallað var um tilurð þeirrar greinar og lýst eftir afdrifum tiltekinna hælisleitenda hér á landi. Fyrir það fyrsta ber að fagna því að slíkir þungaviktarmenn annars vegar í bloggheimi og hins vegar á vegum Þjóðkirkjunnar skuli sýna málefnum hælisleitenda og flóttamanna slíkan áhuga og það er víst að ekki er vanþörf á að fram fari umræða um þessi málefni sem og í reynd önnur mál er varða innflytjendur á Íslandi.