Á liðnu ári barst Útlendingastofnun 871 umsókn um alþjóðlega vernd. Það eru þriðjungi fleiri umsóknir en árið 2020 þegar umsóknir voru 654.

Fjölgunin skýrist fyrst og fremst af miklum fjölda umsækjenda frá Venesúela en 40% allra umsækjenda komu þaðan, samtals 360 einstaklingar. Ríkisborgarar Venesúela voru einnig stærsti hópur umsækjenda árið 2019 en þá voru þeir helmingi færri eða 180. Árið 2020 fækkaði þeim í rúmt hundrað en komur þeirra lögðust nánast af milli apríl 2020 og apríl 2021 vegna ferðatakmarkana af völdum Covid-19.

Einn af hverjum fimm umsækjendum höfðu þegar fengið veitta alþjóðlega vernd í öðru Evrópuríki áður en þeir sóttu um vernd hér, langflestir í Grikklandi. Hlutfall umsækjenda um vernd frá ríkjum á lista yfir örugg upprunaríki var 3%.

Allt í allt voru umsækjendur af 46 ólíkum þjóðernum. Rúmur helmingur umsækjenda voru karlkyns og um þriðjungur voru börn. Fjórtán einstaklingar kváðust vera fylgdarlaus börn.

Þann 1. janúar 2022 kom til framkvæmdar samkomulag íslenskra og breskra stjórnvalda um vinnudvöl ungs fólks (Youth Mobility Scheme visa / Working Holiday). 

Samkomulagið gerir ungum ríkisborgurum landanna tveggja kleift að dvelja í landi hvors annars, í þeim tilgangi að kynnast landinu og menningu þess. Bretland er annað ríkið sem íslensk stjórnvöld gera slíkt samkomulag við, á eftir Japan, en Ísland er fyrsta og eina ríkið á EES-svæðinu sem hefur gert slíkt samkomulag við Breta. 

Nánari upplýsingar fyrir bresk ungmenni sem vilja dvelja tímabundið á Íslandi er að finna á vefsvæði um dvalarleyfi vegna vinnudvalar ungs fólks.

Upplýsingar fyrir íslensk ungmenni sem vilja dvelja tímabundið í Bretlandi er að finna á síðunni Youth Mobility Scheme visa.

Vegna tilkynningar á vef Alþingis um tafir á veitingu ríkisborgararéttar með lögum vill Útlendingastofnun koma eftirfarandi upplýsingum á framfæri.

Þann 1. júní síðastliðinn tilkynnti dómsmálaráðuneytið í bréfi til allsherjar- og menntamálanefndar Alþingis að verklagi Útlendingastofnunar við meðferð umsókna um íslenskan ríkisborgararétt til Alþingis yrði breytt frá og með haustþingi 2021 í því skyni að auka jafnræði umsækjenda og stytta afgreiðslutíma.

Í bréfinu er vísað til samskipta ráðuneytisins, Útlendingastofnunar og allsherjar- og menntamálanefndar allt aftur til ársins 2018 um nauðsyn þess að breyta verklagi við meðferð umsókna um ríkisborgararétt til Alþingis. Jafnframt er þar vísað til bréfs Umboðsmanns Alþingis til dómsmálaráðherra frá því í janúar 2021 varðandi tafir á afgreiðslu umsókna um ríkisborgararétt.

Í samræmi við fyrirmæli dómsmálaráðuneytisins voru umsóknir um íslenskan ríkisborgararétt til Alþingis ekki teknar fram fyrir aðrar umsóknir um ríkisborgararétt og er nauðsynlegri forvinnslu þeirra því ekki lokið. 

Vegna hertra sóttvarnaaðgerða hefur verið ákveðið að afgreiðsla Útlendingastofnunar að Dalvegi 18 verði á ný aðeins opin þeim sem eiga pantaðan tíma.

• Á heimasíðu stofnunarinnar er mikið af gagnlegum upplýsingum sem gott er að byrja á að kynna sér, til dæmis:
  
  • Hverjir þurfa dvalarleyfi og hverjir þurfa áritun til Íslands
  • Upplýsingar um skilyrði umsókna um dvalarleyfi, áritanir og ríkisborgararétt
  • Umsóknareyðublöð
  • Hvaða umsóknir hafa verið teknar til afgreiðslu
  • Svör við algengum spurningum
• Þjónustuver leiðbeinir og aðstoðar í tölvupósti og í síma 444 0900
  
  • Mánudaga til fimmtudaga milli 9 og 14 og á föstudögum milli 9 og 12
  • Athugið að lokað verður 24. og 31. desember
• Fyrir brýn erindi sem ekki er hægt að leysa með öðrum leiðum verður hægt að panta tíma í afgreiðslu
• Umsóknir og önnur gögn er hægt að senda inn með bréfpósti eða skila í póstkassa í anddyri stofnunarinnar (frá 8 til 16 virka daga)
  
  • Gögn sem sett eru í póstkassann þarf að setja í umslag og merkja með nafni umsækjanda og kennitölu/fæðingardegi
• Greiðsluupplýsingar, reikningsnúmer og kennitala Útlendingastofnunar, eru neðst á heimasíðunni
• Nauðsynlegt er að panta tíma í myndatöku fyrir dvalarleyfiskort og ferðaskilríki.
  
  

Við vonum að viðskiptavinir sýni þessu breytta fyrirkomulagi skilning.