Dvalarleyfi fyrir trúboða er fyrir einstakling eldri en 18 ára, sem kemur til dvalar í trúarlegum tilgangi fyrir skráð trúfélag eða þjóðkirkjuna.
Dvalarleyfið er veitt á grundvelli 67. gr. laga um útlendinga nr. 80/2016.
Þú gætir átt rétt á dvalarleyfi fyrir trúboða ef öll eftirfarandi skilyrði eru uppfyllt, ásamt fleirum
- Þú ert eldri en 18 ára,
- ert með formlega skriflega staðfestingu á boði um að koma hingað til lands í trúarlegum tilgangi til að starfa fyrir skráð trúfélag eða þjóðkirkjuna,
- starfið sem þú munt vinna er í samræmi við starfsemi þess trúfélags sem þú munt starfa hjá eða þjóðkirkjunnar,
- þú getur sýnt fram á að þú getir framfleytt þér á dvalartíma með öðrum hætti en launatekjum hér á landi,
- ert sjúkratryggð(ur) hjá íslensku tryggingafélagi (undir liðnum vátryggingafélög) eða erlendu tryggingafélagi sem hefur starfsleyfi á Íslandi (undir liðnum erlend vátryggingafélög),
- hefur ekki afplánað refsingu erlendis á síðustu 5 árum eða verið dæmd(ur) til lengri refsingar en sem samsvarar 3 mánaða fangelsi samkvæmt íslenskum lögum, og
- átt vegabréf þar sem gildistími er minnst 90 dagar umfram áætlaðan gildistíma dvalarleyfis.
Þú mátt ekki
- Byrja að starfa fyrir trúfélag eða þjóðkirkjuna fyrr en dvalarleyfi hefur verið veitt,
- ráða þig í launað starf á íslenskum vinnumarkaði meðan á dvöl þinni stendur,
- vera lengur frá landinu en 90 daga á hverju 12 mánaða tímabili á meðan leyfið er í gildi, annars getur dvalarleyfið verið fellt niður eða afturkallað.
Umsókn um dvalarleyfi og önnur fylgigögn skulu lögð fram hjá Útlendingastofnun eða sýslumönnum utan höfuðborgarsvæðisins.
Umsækjandi sem ekki er áritunarskyldur má vera staddur á landinu þegar umsókn er lögð fram og þegar hún er til vinnslu, svo lengi sem samfelld dvöl á Schengen-svæðinu fer ekki yfir 90 daga á sl. 180 daga tímabili. Umsækjandi sem er áritunarskyldur má ekki vera staddur á landinu þegar umsókn er lögð fram. Slíkri umsókn verður synjað.
Ef umsækjandi uppfyllir ekki þessi skilyrði og þau skilyrði sem fjallað er um að neðan verður dvalarleyfi synjað og umsækjandi þarf að yfirgefa landið. Yfirgefi umsækjandi ekki landið getur það leitt til brottvísunar og endurkomubanns. Endurkomubann felur í sér bann við endurkomu á Schengen-svæðið um ákveðinn tíma eða að lágmarki 2 ár.
Almennt er ekki heimilt að endurnýja dvalarleyfið, en í sérstökum tilvikum er það þó heimilt (t.a.m. í tilviki nunna og presta). Í þeim tilvikum þar sem endurnýjun dvalarleyfis er heimilt, er það á ábyrgð umsækjanda að sækja um endurnýjun dvalarleyfis a.m.k. 4 vikum áður en gildistími leyfis rennur út. Sé það gert er umsækjanda heimilt að dvelja á Íslandi á meðan umsókn um endurnýjun er til vinnslu hjá Útlendingastofnun. Sé ekki sótt um endurnýjun dvalarleyfis áður en gildistími rennur út verður farið með umsókn eins og um fyrsta leyfi sé að ræða en ekki endurnýjun. Umsókn sem berst eftir að gildistími eldra leyfis er útrunninn verður synjað ef umsækjandi hefur ekki heimild til að dvelja á landinu meðan umsókn er til vinnslu. Sjá nánar um feril umsókna og heimild til dvalar.
Nánar um dvalarleyfi fyrir trúboða
Skilgreining á trúboða og réttindi sem fylgja leyfinu
Réttindi sem fylgja leyfinu
Umsókn um fyrsta leyfi
Endurnýjun
Skilgreining á trúboða og réttindi sem fylgja leyfinu
Trúboði samkvæmt útlendingalögum er einstaklingur eldri en 18 ára sem kemur til landsins í trúarlegum tilgangi, það er til ólaunaðs starfs fyrir skráð trúfélag eða þjóðkirkjuna.
Réttindi sem fylgja dvalarleyfinu eru eftirfarandi
- Dvalarleyfið má veita til allt að eins árs, en er þó aldrei veitt lengur en til þess tíma sem boð frá trúfélagi eða þjóðkirkjunni nær yfir.
- Í sérstökum tilvikum er heimilt að endurnýja dvalarleyfið um allt að eitt ár í senn, séu skilyrði leyfisins enn uppfyllt (t.a.m. í tilviki nunna og presta).
- Umsækjanda er ekki heimilt að ráða sig í launað starf á íslenskum vinnumarkaði meðan á dvölinni stendur.
- Dvalarleyfið veitir ekki rétt til fjölskyldusameiningar.
- Dvalarleyfið getur verið grundvöllur ótímabundins dvalarleyfis.
Umsókn um fyrsta leyfi
Umsækjandi sem er áritunarskyldur má ekki vera staddur á landinu þegar sótt er um dvalarleyfið og það er til vinnslu. Slíkri umsókn verður synjað. Umsækjandi sem ekki er áritunarskyldur má vera staddur á landinu þegar umsókn er lögð fram og á meðan hún er til vinnslu, svo lengi sem dvöl á Schengen-svæðinu fer ekki yfir 90 daga á sl. 180 daga tímabili. Fari dvöl fram yfir þann tíma stöðvast vinnsla umsóknar þar til umsækjandi hefur farið af landi brott og lagt fram brottfararspjald því til sönnunar.
Með umsókn skulu fylgja öll þau gögn sem Útlendingastofnun gerir kröfu um til staðfestingar á því að skilyrði dvalarleyfis séu uppfyllt.
Gögn sem þarf að leggja fram
- Greiðslukvittun (ef greitt hefur verið fyrir umsóknina í banka). Koma þarf skýrt fram fyrir hvern er verið að greiða. Skráið nafn umsækjanda, fæðingardag og fæðingarár í tilvísun.
- Umsókn um dvalarleyfi. (Vinsamlegast hlaðið niður og vistið á tölvu áður en fyllt er út).
Í frumriti, vel útfyllt og undirrituð af umsækjanda. Mikilvægt er að umsækjandi greini frá dvalarstað sínum hér á landi. Liggi heimilisfang ekki fyrir þegar umsókn er lögð fram skal umsækjandi leggja fram tilkynningu um dvalarstað innan 2 vikna frá því að umsækjandi kemur til landsins (t.d. við myndatöku). - Passamynd (35mm x 45mm).
- Ljósrit vegabréfs. Gildistími skal vera minnst 90 dagar umfram gildistíma dvalarleyfis. Ljósrit þarf að vera af persónusíðu og síðu með undirskrift umsækjanda.
- Afrit af sakavottorði frá búseturíki. Sakavottorð má ekki vera eldra en 12 mánaða. Sakavottorð skulu gefin út af æðsta yfirvaldi sem heimilt er að gefa út slíkt vottorð í viðkomandi ríki.
- Þýðing löggilts skjalaþýðanda á sakavottorði. Á aðeins við ef erlend vottorð eru á öðru tungumáli en ensku eða Norðurlandamáli. Athugið að krafist er vottunar á þýðinguna sé hún unnin af þýðanda sem ekki hefur fengið löggildingu á Íslandi.
- Sjúkrakostnaðartrygging. Umsækjandi þarf að leggja fram staðfestingu tryggingar frá íslensku tryggingafélagi (undir liðnum vátryggingafélög) eða erlendu tryggingafélagi sem hefur starfsleyfi á Íslandi (undir liðnum erlend vátryggingafélög). Tryggingin skal gilda í 6 mánuði frá skráningu umsækjanda í þjóðskrá og vera að lágmarki 2.000.000 kr. Skráning í þjóðskrá miðast að öllu jöfnu við þá dagsetningu sem umsækjandi kemur til myndatöku hjá Útlendingastofnun eða sýslumanni vegna útgáfu dvalarskírteinis, hafi hann dvalið hér á landi samfellt frá því að myndatakan fór fram.
- Staðfesting á boði um ólaunað starf fyrir trúfélag eða þjóðkirkjuna. Í frumriti og dagsett og undirrituð af forstöðumanni. Í staðfestingu þarf að koma fram hvaða störfum umsækjandi muni sinna og hve langa dvöl sé um að ræða. Einnig þarf að koma fram staðfesting á því að trúfélagið eða þjóðkirkjan tryggi umsækjanda húsnæði og framfærslu hér á landi.
- Framfærslugögn, ef við á. Umsækjandi þarf sjálfur að sýna fram á trygga framfærslu á dvalartíma.
Gögn sem heimilt er að leggja fram
- Umboð í frumriti vottað af tveimur vottum. Umboð þarf ekki að berast nema umsækjandi vilji að einhver annar en hann sjálfur fái upplýsingar um vinnslu umsóknarinnar hjá Útlendingastofnun.
Það er á ábyrgð umsækjanda að leggja fram nauðsynleg fylgigögn umsóknar. Ef fullnægjandi gögn berast ekki til Útlendingastofnunar með umsókninni getur það leitt til þess að afgreiðsla umsóknar tefjist eða að umsókninni verði synjað. Útlendingastofnun getur óskað eftir viðbótargögnum þegar sérstakar ástæður mæla með því.
Uppfylli umsækjandi öll skilyrði dvalarleyfis verður dvalarleyfið veitt og umsækjanda í framhaldinu send tilkynning um veitinguna. Dvalarleyfið verður þó ekki útgefið fyrr en umsækjandi hefur mætt í myndatöku til Útlendingastofnunar eða sýslumanna utan höfuðborgarsvæðisins, tilkynnt um dvalarstað til Útlendingastofnunar og gengist undir læknisskoðun. Miðað er við að umsækjandi mæti til myndatöku innan við viku frá komu til landsins, og leggi fram tilkynningu um dvalarstað (t.d. við myndatöku) og gangist undir læknisskoðun innan tveggja vikna frá komu til landsins. Útlendingastofnun synjar um útgáfu dvalarleyfis uppfylli umsækjandi ekki ofantalin skilyrði. Það getur leitt til ólögmætrar dvalar og brottvísunar.
Endurnýjun
Heimilt er að endurnýja dvalarleyfi fyrir trúboða í sérstökum tilvikum (t.a.m. í tilviki nunna og presta). Sækja þarf um endurnýjun dvalarleyfis a.m.k. 4 vikum áður en gildistími leyfis rennur út. Sé það gert er umsækjanda heimilt að dvelja á Íslandi á meðan umsókn um endurnýjun er til vinnslu hjá Útlendingastofnun. Sé ekki sótt um endurnýjun dvalarleyfis áður en gildistími rennur út verður farið með umsókn eins og um fyrsta leyfi sé að ræða en ekki endurnýjun. Umsókn sem berst eftir að gildistími eldra leyfis er útrunninn verður synjað ef umsækjandi hefur ekki heimild til að dvelja á landinu meðan umsókn er til vinnslu. Sjá nánar um feril umsókna og heimild til dvalar.
Umsækjandi þarf að mæta í eigin persónu við endurnýjun dvalarleyfis, annað hvort í afgreiðslu Útlendingastofnunar eða til sýslumanna utan höfuðborgarsvæðis. Tekin er mynd af umsækjanda og þarf hann að veita rithandarsýnishorn. Umsækjanda ber að hafa vegabréf sitt meðferðis.
Gögn sem þarf að leggja fram
- Greiðslukvittun (ef greitt hefur verið fyrir umsóknina í banka). Koma þarf skýrt fram fyrir hvern er verið að greiða. Skráið nafn umsækjanda, fæðingardag og fæðingarár í tilvísun.
- Umsókn um dvalarleyfi. (Vinsamlegast hlaðið niður og vistið á tölvu áður en fyllt er út). Í frumriti, vel útfyllt og undirrituð af umsækjanda.
- Ljósrit vegabréfs. Gildistími skal vera minnst 90 dagar umfram gildistíma dvalarleyfis. Ljósrit þarf að vera af persónusíðu og síðu með undirskrift umsækjanda.
- Staðfesting á boði um ólaunað starf fyrir trúfélag eða þjóðkirkjuna. Í frumriti og dagsett og undirrituð af forstöðumanni. Í staðfestingu þarf að koma fram hvaða störfum umsækjandi muni sinna og hve langa dvöl sé um að ræða. Einnig þarf að koma fram staðfesting á því að trúfélagið eða þjóðkirkjan tryggi umsækjanda húsnæði og framfærslu hér á landi.
- Framfærslugögn, ef við á. Umsækjandi þarf sjálfur að sýna fram á trygga framfærslu á dvalartíma.
Gögn sem heimilt er að leggja fram
- Umboð í frumriti vottað af tveimur vottum. Umboð þarf ekki að berast nema umsækjandi vilji að einhver annar en hann sjálfur fái upplýsingar um vinnslu umsóknarinnar hjá Útlendingastofnun.
Það er á ábyrgð umsækjanda að leggja fram nauðsynleg fylgigögn umsóknar. Ef fullnægjandi gögn berast ekki til Útlendingastofnunar með umsókninni getur það leitt til þess að afgreiðsla umsóknar tefjist eða að umsókninni verði synjað. Útlendingastofnun getur óskað eftir viðbótargögnum þegar sérstakar ástæður mæla með því.