Lokað verður hjá Útlendingastofnun frá klukkan 12 á hádegi föstudaginn 10. desember vegna starfsdags.

Við biðjumst velvirðingar á þeim óþægindum sem þetta kann að valda.

Ríkisstjórn Íslands hefur samþykkt tillögur flóttamannanefndar um viðbrögð við neyðarástandinu í Afganistan í kjölfar valdatöku talibana.

Tillögurnar fela meðal annars í sér að íslensk stjórnvöld muni aðstoða Afgana sem eiga rétt á fjölskyldusameiningu eða eru nú þegar komnir með dvalarleyfi hér á landi að komast til landsins. Um er að ræða bæði einstaklinga sem hafa fjölskyldutengsl hér sem og einstaklinga sem hyggjast hefja hér nám.

Jafnframt verður vinnsla umsókna um fjölskyldusameiningu við Afgana, eins og hún er skilgreind í lögum um útlendinga, sett í forgang.

Réttur til fjölskyldusameiningar samkvæmt lögum um útlendinga

Dvalarleyfi á grundvelli fjölskyldusameiningar eru aðeins veitt nánustu aðstandendum einstaklinga sem búsettir eru hér á landi og hafa rétt til fjölskyldusameiningar.

Rétt til fjölskyldusameiningar eiga:

• íslenskir ríkisborgarar,
• norrænir ríkisborgarar,
• erlendir ríkisborgarar sem hafa ótímabundið dvalarleyfi,
• erlendir ríkisborgarar sem hafa tímabundið dvalarleyfi:
  
  • sem sérfræðingar,
  • sem íþróttamenn,
  • sem makar eða sambúðarmakar,
  • sem nemar í framhaldsnámi (aðeins fyrir maka, sambúðarmaka og börn)
  • á grundvelli alþjóðlegrar verndar,
  • á grundvelli mannúðarsjónarmiða eða
  • vegna sérstakra tengsla við landið.

Nánustu aðstandendur í skilningi laga um útlendinga eru

• makar,
• sambúðarmakar,
• börn yngri en 18 ára, í forsjá og á framfæri viðkomandi, og
• foreldrar 67 ára og eldri.

 
Sérstakar reglur gilda um fylgdarlaus börn sem búa á Íslandi á dvalarleyfi á grundvelli alþjóðlegrar verndar en þau ein eiga rétt til fjölskyldusameiningar við eftirtalda aðstandendur:

• foreldra (óháð aldri) sem fara með forsjá þeirra og hyggjast búa með barni sínu hér á landi og 
• systkini yngri en 18 ára, sem eru án maka og búa hjá foreldrunum eða foreldrinu.

Af ofan töldu má sjá að rétturinn til fjölskyldusameiningar takmarkast við kjarnafjölskylduna. Aðrir fjölskyldumeðlimir eða ættingjar svo sem fullorðin systkini, frænkur, frændur eða foreldrar undir 67 ára aldri eiga ekki rétt á dvalarleyfi á grundvelli fjölskyldusameiningar.

Útlendingastofnun biðlar til þeirra sem vilja leggja inn umsóknir að kynna sér vel hverjir geta átt rétt á fjölskyldusameiningu áður en umsókn er lögð fram.

Takmörkunum sem verið hafa á útgáfu dvalarleyfiskorta að undanförnu hefur nú verið aflétt.

Til að fá útgefið dvalarleyfiskort þarf Útlendingastofnun að eiga mynd af dvalarleyfishafa í kerfum sínum sem var tekin innan síðustu sex mánaða.

Hægt er að bóka tíma í myndatöku á noona.is. Nauðsynlegt er að gefa upp íslenskt símanúmer ásamt nafni og fæðingardegi/kennitölu við bókun.

Þegar mætt er í myndatöku er mikilvægt að framvísa vegabréfi. Vinsamlegast munið að segja starfsfólki á hvaða heimilisfang skuli senda kortið til að tryggja að það berist á réttan stað þegar það er tilbúið.

Alþingi samþykkti lög um veitingu ríkisborgararéttar 13. júní síðastliðinn en lögin taka ekki gildi fyrr en daginn eftir birtingu þeirra í stjórnartíðindum.

Útlendingastofnun hefur ekki upplýsingar um hvenær lögin verða birt að þessu sinni en sambærileg lög hafa undanfarið verið birt fjórum til sex vikum eftir að þau voru samþykkt á Alþingi. Líklegt er að lögin taki því ekki gildi fyrr en eftir miðjan júlí.

Þegar lögin hafa tekið gildi útbýr Útlendingastofnun ríkisfangsbréf fyrir þá umsækjendur sem fengu veittan íslenskan ríkisborgararétt og sendir þau til Þjóðskrár. Liðið geta nokkrir dagar þar til Þjóðskrá hefur skráð umsækjendurna með íslenskt ríkisfang í þjóðskrárkerfið en fyrst þá geta þeir sótt um íslenskt vegabréf hjá embætti sýslumanns.

Alþingi sendir út synjunarbréf til þeirra sem ekki var veitt íslenskt ríkisfang. Ákvörðun um veitingu var alfarið í höndum Alþingis og getur Útlendingastofnun ekki svarað því hvers vegna tilteknum umsækjanda var ekki veittur íslenskur ríkisborgararéttur.